ခင်မင်မှုကို အလွှဲသုံးစားလုပ်ခြင်း
ကောင်လေး။ ။ ကောင်မလေး၊ နင့်ကို ငါတစ်ခုမေးမယ်။ နင်တို့ မိန်းကလေးတွေရဲ့ လက်စွဲစကားတစ်ခုလေ.. ဘာတဲ့။ ဟို… “ခင်မင်မှုကို အလွှဲသုံးစားလုပ်တယ်” ဆိုတာ…
ကောင်မလေး။ အေး.. အဲ့တာ ဘာဖြစ်တုန်း…
ကောင်လေး။ အေး.. ငါတစ်ခုသိချင်တာက.. နင်တို့ကို ခင်အောင် မပေါင်းပဲ… တိုက်ရိုက်ကြီး လာဖွင့်ပြောတာမျိုးကို နင်ကြိုက်နိုင်ပါ့မလား… အဲ့တာမျိုးက မမိုက်တော့ပါဘူးဟာ..
ကောင်မလေး။ ဒီမှာ.. ကောင်လေး.. နင်တို့ ယောကျာ်းလေးတွေမှာ ၁၀ယောက်မှာ ၈ယောက်ခွဲလောက်က ခင်ချင်ပါတယ် ပြောပြီး ဖွင်ပြောမယ့် ကောင်တွေကြီးပဲ။ အဲ့တော့.. ငါတို့က ပြန်ခင်တာလည်း အတော်ဆင်ခြင်ရတယ်… ဒီလောက်ဆင်ခြင်တဲ့ ကြားထဲက တခါတလေ သုူတို့ကို… ပြန်ကြိုက်ပြီဆိုတာမျိုးက ထင်တတ်ကြသေးတယ်။ အဲ့လို ကောင်မျိုးတွေကြတော့ သူငယ်ချင်းသစ္စာ ပျက်လို့ အလွှဲသုံးစားလုပ်တယ်လို့ ငါတို့က ပြောတာပေါ့… ငါတော့ လွန်တယ် မထင်ပါဘူး။
ကောင်လေး။ အယ်… ဟုတ်ပါပြီ ကောင်မလေးရဲ့။ နင်ရဲ့ ၈၅ရာခိုင်နှုန်းဆိုတဲ့ သီအိုရီကို နင် သေချာတယ်ဆိုရင်… ချဉ်းကပ်လာတဲ့ ယောကျာ်းလေးတွေကို ပါးပါးနပ်နပ် မဆက်ဆံသင့်ဘူးလား… ငါဆိုလိုတဲ့ သဘောက နင့်အနေနဲ့ သူတို့တွေကိုလေ့လာခွင့် ရတာပေါ့ဟ..နောက်ပြီး… ဘယ်သူက ချဉ်းကပ်လာတာလဲ၊ ဘယ်သူက သူငယ်ချင်းအဖြစ် ရောက်လာလဲ ဆိုတာ.. နင်တို့ မိန်းကလေးတွေ သိမယ်လို့ ငါယုံတယ်… အဲ့တော့… ချဉ်းကပ်လာတဲ့သူတွေထဲက မဖြစ်နိုင်တဲ့သူတွေကို အစောကြီးထဲက ခပ်တန်းတန်း နေပြပေါ့။ ကိုယ့်အနေနဲ့လည်း စိတ်ဝင်စားတဲ့ လူမျိုးဆိုရင်တော့ အပြန်အလှန် အကဲခတ်ပေါ့ဟ.. ကိုယ်က သူငယ်ချင်းလို့ ယုံလို့ ပေါင်းတဲ့လူက… နင်ပြောသလို သစ္စာပျက်ပြီး သူ့အချစ်အကြောင်းကို ရင်ဖွင့်လာမယ်ဆိုလဲ “မဖြစ်နိုင်ဘူး၊ သူငယ်ချင်းလိုပဲ တချိန်လုံး သဘောထားခဲ့တာ” ဆိုတာကို အေးအေးဆေးဆေး ရှင်းပြလိုက်ပေါ့… “ခင်မင်မှုကို အလွှဲသုံးစားလုပ်တယ်” ဆိုတာကတော့ နည်းနည်း ပြင်းသလားလို့။ သူတို့ ဘာမှ ကြီးကြီးမားမား မမှားကြဘူး ထင်တာပဲ။
ကောင်မလေး။ ဘာမှ မမှားဘူးတော့ မဟုတ်ဘူး ကောင်လေး။ နင် ပြောတဲ့ အခြေနေသုံးခုမှာ.. ကိုယ်သိပ်စိတ်မဝင်စားတဲ့ ကောင်လေးမို့လို့ ခပ်တန်းတန်းနေရင် သူက ပြောလိ့မ်မယ်။ “အဲ့ဟာမလေးက မာနခပ်ကြီးကြီး၊ ဖနောင့်သံစူးလေး” လို့။ ကိုယ်က ကိုုယ်နဲ့ ဖြစ်နိုင်မယ်ထင်လို့ အကဲခတ်တာပဲ ဖြစ်ဖြစ်၊ သူငယ်ချင်းပေါင်း ပေါင်းတာပဲ ဖြစ်ဖြစ် လုပ်ပြန်တော့လည်း တချို့တချို့သော ယောကျာ်းတွေက ဒီကောင်မလေး ငါ့ကို ညွတ်နေသလားဆိုတဲ့ ယဉ်ကျေးမှုနိမ့်နဲ့ အတွေးနဲ့ အခွင့်အရေးတစ်ရပ်ကို မဖြစ်မနေယူဖို့ ကြိုးစားကြတယ်.. အဲ့တာ ကိုယ်က ပြန်ခင်လိုက်ယုံရှိသေးတာနော်.. ကိုယ့်ဘက်က စရင်ခုန်ရတဲ့ ကိစ္စဆို… ဆောရီးပဲ.. နည်းနည်းလေးတောင် မသိစေနဲ့တော့… ဒါပေမယ့် နင်ပြောတဲ့ တစ်ယောက်နဲ့ တစ်ယောက် လေ့လာတယ် ဆိုတာလေးတော့ ကောင်းပါတယ်။ ငါလည်း သဘောကျတယ်။ နားလည်မှုကို ဖလှယ်ကြည့်ပြီး အဆင်ပြေနိုင်မယ့် သဘောတူညီချက်တွေ ယူလို့ရတာပေါ့။ ဒါပေမယ့်ဟာ…
ကောင်လေး။ အေးပါဟာ.. နင်ပြောပြတာတချို့ကို ငါလည်း ငြင်းမရပါဘူး။ ဒါပေမယ့်လည်း နင်ပြောသလို “တချို့တချို့သော” တွေအတွက်နဲ့တော့ “အလွှဲသုံးစားလုပ်ခြင်း” ရယ်ဆိုတဲ့ ပြင်းထန်တဲ့ အသုံး မသုံးစေချင်လို့ပါ။ ကဲပါဟာ.. နင်လည်း လိမ္မော်ရည်ကုန်အောင် သောက်လိုက်ဦး။ နေလည်းစောင်းနေပြီ။ နောက်မှ ဆက်ပြောကြတာပေါ့… နော်။
(အတတ်နိုင်ဆုံး သဘာဝကျအောင် ရေးထားပါတယ်။ အနိုင်အရှုံးအတွက် ငြင်းတာမျိုး မဟုတ်ပဲ လက်ရှိလူ့ဘောင်မှာ ဖြစ်နေတာကို ကောင်လေးတစ်ယောက်နဲ့ ကောင်မလေးတစ်ယောက်က သုံးသပ်ထားတာမျိုးပါ။ ဖတ်ရတာ ထောင့်နေရင် ပြောပါခင်ဗျာ။)
လေးစားလျက်
mgthantzin
စကားမစပ်၊ နန္ဒသိန်းဇံရေးတဲ့ ပြောရင်းပြောနေဦးမည့် အချစ်အကြောင်း ဆိုတဲ့စာအုပ်လေး… အနော့်ကို ခင်ရင် လက်ဆောင်ဝယ်ပေးကြပါလား။ သူငယ်ချင်း တစ်ယောက်ကို လက်ဆောင်ပြန်ပေးချင်လို့။ =)