သက်ရှိထင်ရှားဆိုရင်တော့ ကျွန်တော်တို့ ဗိုလ်ချုပ် ဒီနေ့အသက် (၉၂)နှစ်ပြည့်ပါပြီ။ ကျွန်တော်တို့ လူငယ်တွေ ဗိုလ်ချုပ်လို အမျိုးသားရေးဦးသျှောင်ကို မလေးစားပဲ မနေနိုင်တဲ့ အကြောင်းရင်းတွေကတော့ ဗိုလ်ချုပ်ရဲ့ အနေရိုးမှု နဲ့ ဘယ်သူမှ ယှဉ်ရဲစရာမရှိတဲ့ တိုင်းချစ်ပြည်ချစ် စိတ်ဓာတ်တွေဟာ အဓိက ဖြစ်နေပါလိမ့်မယ်လို့ ယုံကြည်ပါတယ်။ ဒီနေ့ ဗိုလ်အောင်ဆန်းဆိုတဲ့ သီချင်းရယ်၊ ဗိုလ်ချုပ်ရဲ့ မိန့်ခွန်းတချို့ရယ်ကို ပြန်တင်ပြချင်ပါတယ်။ ဒီမိန့်ခွန်းအားလုံးကို ယုံကြည်မှုဂျာနယ် အတွဲ (၇) ၊ အမှတ် (၁) ကနေ ကူးယူဖော်ပြပါတယ်။
ဗမာနိုင်ငံတော်ရဲ့ အကျိုးကို ရှေးရှုပြီး မညှာတမ်း ကျွန်တော်တို့ အလုပ်လုပ်ကြရလိမ့်မယ်။ ကျွန်တော့်အတွက် ပြောရမယ်ဆိုရင် ဗမာနိုင်ငံတော်ကြီးရဲ့ ကျေးဇူးသစ္စာကို မှန်ကန်စွာ စောင့်ထိန်းပြီး ကျွန်တော့်အပေါ်မှာ ကျရောက်တဲ့ တာဝန်ဝတ္တရားအရပ်ရပ်ကို ဦးလည်မသုန် မညှာတာ လာဘ်လာဘမမျှော်ဘဲ ဆောင်ရွက်ဖို့ အသင့်ပါပဲ။ ဆိုင်ရာ လူတိုင်းလူတိုင်းကလဲ ရွက်ဆောင်ကြိုးစားရမှာပဲ။ ကျွန်တော်အသုံးမကျရင်လဲ ကျွန်တော့်အား မညှာတမ်းပဲ လုပ်ကြဖို့ဆိုတာကို လေးလေးနက်နက် နောက်ဆုံးစကား ပြောခဲ့ပါတယ်။
အခု တိုင်းပြည်မှာ အမှန်လိုနေတာက လူတွေကြိုက်ချင်ကြိုက်၊ မကြိုက်ချင်နေ တိုင်းပြည်ကြီးပွားမယ့်နည်းလမ်း ဟူသမျှ လူတွေမလိုက်နာမနေရမယ့် ဥပဒေ ထုတ်ဖို့လိုတယ်။
လူမျိုးတစ်မျိုး၏ တိုးတက်ခြင်း၊ လျော့ကျခြင်းတို့သည် ထိုလူမျိုး၏ ပစ္စည်းအင်အားပေါ်မှာသာ တည်ရှိနေသည် မဟုတ်။ စိတ်ဓာတ်အင်အား အပေါ်သာ တည်ရှိနေသည်။ ဗမာ့သမိုင်းကို ပြန်လည်၍ ကြည့်ရှုလျှင် ဗမာတို့သည် စိတ်ဓာတ်အင်အား ကြီးမားကြောင်းကို ထင်ရှားစွာတွေ့မြင်ရလိမ့်မည်။ အသင်တို့သည် ဗမာတို့သတ္တိကို ပြန်လှန်၍ ဖော်ပါလော့။ ပေါ့ပေါ့ဆဆ မနေစေဘဲ၊ ပျင်းရိစွာ မနေစေဘဲ။ အကျိုးဆောင်လိုသောစိတ်ဓာတ်၊ အလုပ်လုပ်လိုသော စိတ်ဓာတ်တို့ကို ထိန်းပေးသင့်လေသည်။ ယင်းသို့ စိတ်ဓာတ်သစ် သွင်းပေးနိုင်လျှင် ဗမာနိုင်ငံသည် အမှန်မုချ ကြီးပွားတိုးတက်မည် ဖြစ်သည်။
ကျွန်တော်တို့၏ လက်သုံးဝါဒက ကျွန်တော်တို့ တိုင်းပြည်ရှိလူထု၏ တိုးတက်ကြီးပွားရေးဝါဒသာ ဖြစ်တယ်။ ကမ္ဘာ့ခေတ်မီ အုပ်ချုပ်ရေးစည်းကမ်းများ အသုံးပြုသည့် နေရာများတွင်လည်း ဗမာ့ဉာဏ်၊ ဗမာ့လိုလားချက်များနဲ့ ဆီလျော်တိုက်ညီအောင် သတိကြီးစွာထား၍ ရေးဆွဲခြင်းပြုခဲ့တယ်။
မိမိမှာ နိုင်ငံခြားငွေ ရင်းတည်လာသူများကို ဗမာပြည်ဥပဒေလက်အောက်တွင် တည်ရှိနေမည်ဆိုက ကန့်ကွက်စရာ အကြောင်းမရှိ။
မိမိတို့သည် ပထမဆုံး လယ်ယာစိုက်ပျိုးရေးကို အားပြည့်စေရမယ်၊ ယခုအချိန်တွင် ဗမာပြည် ပြန်လည်ထူထောင်ရေး အတွက် ပြင်ဆင်ရဦးမယ်။ မိမိတို့သည် ဗမာပြည်ကို ခေတ်မီတိုင်းပြည်ဖြစ်စေရန်၊ အခွင့်အလမ်းသာသမျှ စက်မှုလက်မှုလုပ်ငန်းများ ထူထောင်မယ်။
ခေါင်းဆောင်ဟာ နောက်လိုက်တဲ့လူထက် အမြော်အမြင် ရှိရမယ်။ ခေါင်းဆောင်တတ်ရမယ်။ ဟိုလူပြော ဟုတ်နိုးနိုး၊ ဒီလူပြော ဟုတ်နိုးနိုး။ သူ့မှာ ဘယ်တော့မှ ခေါင်းဆောင် မဖြစ်နိုင်ဘူး။ နိုင်ငံရေးမှာ အသက်စွန့်တဲ့ နေရာမှာ စွန့်ရမယ်။ သူများယောင်လို့ ယောင်၊ အမောင်တောင်မှန်း မြောက်မှန်းမသိ သူမှာ ဘယ်တော့မှ ခေါင်းဆောင် မဖြစ်နိုင်။
နိုင်ငံရေးနဲ့ စည်းကမ်းကို ခွဲခြားနားလည်ပါ။ စည်းကမ်းမရှိရင် အလုပ်လုပ် မဖြစ်ဘူး။ ဒီစည်းကမ်းတွေ အင်္ဂလိပ်လုပ်ခဲ့တာလို့ ပြောချင်ပြော၊ စည်းကမ်းဟာ စည်းကမ်းပဲ။ အထက်အရာရှိက အမိန့်တစ်ခု ပေးတယ် ဆိုပါတော့။ ဆိုးဝါးနေရင် အမိန့်မချခင်အထိ ပြုပြင်အောင် ပြောပါ။ မရရင် ဆိုင်ရာကို တိုင်ပါ။ အချိန်တော့ ကြာမှာပဲ။ ဒီလို စည်းကမ်းအတိုင်းသွားရမယ်။ စည်းကမ်းတစ်ခု ဖောက်ဖျက်ချင်တယ်ဆိုရင် ဒီစည်းကမ်း ဖောက်ဖျက်လို့ ခံရမယ့် အပြစ်ဒဏ်ကို နားလည်စေရမယ်။ မတရားတာကို တိုင်ဖျက်ချင်ရင် ပေးသမျှ အပြစ်ဒဏ်ကို ဘာဖြစ်ဖြစ် ခံရမယ်ဆိုတာ နားလည်ရမယ်။ အမိန့်ပြင်အောင် စည်းကမ်းနဲ့ ကြိုးစားပါ။ မပြီးခင် ဒီအမိန့်အတိုင်းလိုက်နာနေပါ။
