mastodon

ကမ္ဘာပေါ်တွင် အပေါ့ဆုံးအရာ

October 20, 2008

ပဉ္စမတန်း။ လပတ်စာမေးပွဲ။ သိပ္ပံဘာသာ။ ၂ မှတ်တန်မေးခွန်း။ ကျောင်းသားတိုင်း ခေါင်းစားနေတယ်။ ကမ္ဘာပေါ်တွင် အပေါ့ဆုံးအရာသည် အဘယ်နည်း။

တော်တော်များများက အငွေ့ဖြစ်သည်။ (အဟိ… ဘောင်တော့ နည်းနည်းလွတ်တယ်နော်) အကုန်မှားပြီး အမှတ်တွေ လျော့ကုန်ကြရော။ (အခုပြန်စဉ်းစားကြည့်တော့လည်း အဖြေမှန်ကို မမှတ်မိသေးဘူး။)

ဒါပေမယ့် အတန်းထဲမှာ တချို့ အမှတ်ပြည့်ရတယ်.. Hyper လေးတွေ ၂ယောက်၊ ၃ယောက်။ (အမှန်တော့ အနီးအနားမှာ ထိုင်တဲ့ သူငယ်ချင်း အရင်းကြီးတွေပါ။) အဲ့တာနဲ့ အဲ့ဒီကောင် ၂ကောင်၊ ၃ကောင်ကို မင်းတို့ကဘယ်လိုဖြေလို့လဲ ဆိုပြီး အားလုံးဝိုင်းမေးကြရော…။ ဒါပေမယ့် ဒီကောင်တွေက… မေးတာကို ကောင်းကောင်းမဖြေဘူး။ ဟိုလိုလို… ဒီလိုလိုပေါ့။

နောက်ဆုံးတော့ မကောင်းတတ်တော့တာနဲ့ ဒီကောင်တွေရဲ့ အဖြေလွှာတွေကို ဒီကောင်တွေ ထုတ်ပြရရော။ အောင်မယ်… ဆရာသမားတွေကလည်း.. အငွေ့ပဲ။ ဒါပေမယ့် အမှန်ခြစ်ကလေးနဲ့။… ဒါမျိုးဘယ်ရမလဲ။ ဆရာမကို Complaint ပြန်တတ်ကြတာပေါ့။ ဆရာမမှာလည်း… သူ *မတော်တဆ* အမှန်ပေးလိုက်မိတော့ အမှတ်ပြန်လျှော့ လိုက်ပါတယ်။ (ချစ်သူငယ်ချင်းကြီးတွေတော့ မျက်နှာမကောင်းရှာပါဘူး။)

အခုပြန်စဉ်းစားကြည့်တော့ အတော်ကလေးဆန်တဲ့ အလုပ်လို့ မြင်ပါတယ်။ ဒါပေမယ့်လည်း.. တစ်ဖက်ကပြန်စဉ်းစားရင်… ကလေးတွေပဲမို့လို့ ကလေးဆန်တဲ့ အလုပ်ကို အောင်အောင်မြင်မြင် လုပ်ခဲ့ကြသလားလို့… စဉ်းစားလျက်ပါ။

ကျေးဇူးတင်ပါတယ်။

mgthantzin

Profile picture
Written/Curated by Thant Zin Oo
← Back to Blog