ကျွန်တော့်အဖေ ကျွန်တော် စင်္ကာပူလာခါနီးမှာ “မင်းဖတ်ဖို့” ဆိုပြီး စာအုပ်တစ်အုပ် ပေးပါတယ်။ အဖေ အဲ့လို ပေးတာ ရှားပါတယ်။ စာအုပ်က G. Kingsley Ward ရေးတဲ့ Letters of a Businessman to His Son ကို ဆရာဖေမြင့်က “ကိုယ်ပိုင်လုပ်ငန်းနဲ့ ကြီးပွားမယ့် ပုဂ္ဂိုလ်” ဆိုတဲ့ နာမည်တဲ့ ဘာသာပြန်ထားတဲ့ စာအုပ်ပါ။

စာအုပ်ရဲ့ ရှေ့မှာ အဖေက သူ့လက်မှတ်ထိုးပြီး ပေးတာပါ။ ကျွန်တော် အဲ့ဒီစာအုပ်ကို တော်တော်ကြိုက်ပါတယ်။ စာအုပ်ထဲမှာက… စီးပွားရေးသမား အဖေတစ်ယောက်က သူ့သားကို Letter ပုံစံရေးပြီး လူ့ဘဝအကြောင်း အမျိုးမျိုးကို သွန်သင်ထားတာပါ။

ရင်ဆိုင်ယှဉ်ပြိုင်ရဲတဲ့ စိတ်

အောင်မြင်မှု

လက်တွေ့ဘဝထဲက ပထမနေ့ရက်များ

ဖြောင့်မတ်တည်ကြည်မှု

လက်အောက်လုပ်သားများ

တာဝန်ခွဲဝေခိုင်းစေတတ်ခြင်း

တေ့ဆိုင်စေ့စပ်ညှိနှိုင်းခြင်း အတတ်

အိမ်ထောင်ပြုတယ်ဆိုတာ

လုပ်ငန်းချဲ့ထွင်တဲ့ နေရာမှာ

ငွေ

ပရိသတ်အရှေ့မှာ စကားပြောခြင်း

ဘဏ်မန်နေဂျာများနဲ့ ဆက်ဆံရတဲ့ နေရာမှာ

စာဖတ်ခြင်းရဲ့ ကျေးဇူး

ချမ်းသာသုခဆိုတာ

ငွေရေးကြေးရေး စိတ်အေးရဖို့

စိတ်ဖိစီးမှုနှင့် သင့်ကျန်းမာရေး

ခေါင်းဆောင်ဆိုတာ

ဘက်စုံပြည့်စုံတဲ့ ဘဝ

လုံးလုံးလျားလျား ကိုယ့်ခြေထောက်ပေါ်မှာ

ဆိုတာတွေဟာ… စာအုပ်ထဲမှာပါတဲ့ Chapter ၃၁ ခုထဲက တချို့ပါ။ ဒါဆိုရင် စာအုပ်ရဲ့ Content အမျိုးအစားကို ခန့်မှန်းလို့ ရနိုင်ပါပြီ။

ကျွန်တော်အခု Highlight လုပ်မှာကတော့ “အိမ်ထောင်ပြုတယ်ဆိုတာ” ဆိုတဲ့ Chapter ပါ။ တိုက်ရိုက်ကူးတယ် ပြောပြော၊ ကောက်နှုတ်တယ် ပြောပြောပါ။ စာဖတ်နေတဲ့လူတွေကို ဒီအကြောင်းလေး ဖတ်ဖူးစေချင်လို့ပါ။ ရှည်မျောမျောပုံစံ ရှိတဲ့ သူ့စာအုပ်ဆိုဒ်နဲ့ ၇ မျက်နှာကို ချုံ့ပြုပြီး ကိုယ့်စကားလုံးနဲ့ ပြန်ရေးထားပါတယ်။ (ဖြုတ်လိုက်တဲ့ စာပိုဒ်တွေလည်း ရှိပါတယ်။) တချို့စာပိုဒ်တွေကိုတော့ တစ်လုံးမကျန် ကူးထားတာပါ။ ပြင်လိုက်ရင် ဖတ်လို့ မကောင်းတော့လို့ပါ။ ကဲ… ဖတ်ပြီး နှစ်သက်နိုင်ကြပါစေ… ဗျာ။ ထပ်ပြောပါရစေ။ ကူးရေးထားတာပါ… နော်…

သားရေ…

မာတင်လူသာက ပြောဖူးတယ်။ “အဆင်ပြေတဲ့ အိမ်ထောင်တစ်ခုထက် ပိုပြီး နှစ်သက်ခင်တွယ်စရာ၊ ရင်းနှီးကျွမ်းဝင်စရာ ဆက်ဆံမှု ဆုံစည်းပေါင်းဖွဲ့မှုမျိုး မရှိ” တဲ့။ နှစ်သက်ခင်တွယ်စရာ ဆိုပေမယ့်… သားရေ… အလွယ်တကူ သွားလုပ်လို့တော့ မဖြစ်ဘူး။ အင်မတန်ကို အလေးအနက် ထားရလိ့မ်မယ်… သား။

သားရေ… အိမ်ထောင်မှုဆိုတာ သဘာဝဆွဲအားချင်း တွေ့ကြုံဆုံစည်းမှုလို့ အခြေခံကျကျ ပြောနိုင်ပေမယ့် ဦးနှောက်နဲ့ နှလုံးသား နှစ်ခုပေါင်းပြီးမှ ဖြစ်ရမှာပါ။

အိမ်ထောင်မှုဆိုတာ ဘဝမှာ နေရာအကြီးကြီး ယူတတ်တာမျိုးပါ။ ခပ်ပေါ့ပေါ့လုပ်လိုက်မိလို့ ကွာရှင်းပြတ်စဲ ထိခိုက်ခံစားရုံမကလို့ ဘဏ်မှာရှိတဲ့ ငွေလေး ပြောင်သွားတာမျိုးပါ ခံစားရလိမ့်မယ်။ မစဉ်းစားခဲ့လို့ ပေးဆောင်ရတဲ့ ဒဏ်ကြေးပေါ့ကွာ။

အိမ်ထောင်တစ်ခုပြိုကွဲပြီဆိုရင် စိတ်ပိုင်းဆိုင်ရာ ထိခိုက်ပျက်ယွင်းမှုတွေလည်း ခံစားရတာ ဓမ္မတာပဲ သား။ ကလေးတွေ ရှိရင်တော့ ပိုဆိုးပေါ့ကွာ။

ဒီနေ့လူငယ်တွေ ကြားထဲမှာ လွှမ်းမိုးနေတဲ့ “အဆင်မပြေလည်း ကွာလိုက်ကြတာပေါ့ကွာ” ဆိုတဲ့ အယူအဆကတော့… ပေါ့ပေါ့တန်တန် နိုင်လွန်းပါတယ် သားရယ်။ ဘဝအတွက် သိပ်အရေးကြီးတဲ့ အရာတစ်ခုကို ပစ်စလက်ခက် လုပ်နေကြတာ တကယ် စိတ်မကောင်းစရာ။ နောက်ပိုင်းကျတော့မှာ ပြဿနာတွေ မဖြစ်သင့်ပဲ ဖြစ်ကြ၊ ဒုက္ခတွေ မရောက်သင့်ပဲ ရောက်ကြရမှာပဲ။

သေချာလေ့လာကြည့်မယ်ဆိုရင် တကယ်အောင်မြင်နေတဲ့ အကောင်းဆုံး အိမ်ထောင်တော်တော်များများဟာ တစ်ဦးအပေါ်တစ်ဦး ထားရှိတဲ့ မေတ္တာအပြင် ဒီအိမ်ထောင်ကို အောင်အောင်မြင်မြင် တည်ဆောက်မယ်ဆိုတဲ့ စိတ်ဓာတ်တစ်ခုကလည်း မယိမ်းမယိုင် ခိုင်ခိုင်မာမာရှိကြလို့ဆိုတာ သားမှတ်ထားပါ။

ဘယ်လိုမိန်းကလေးမျိုးကို သားရွေးမလဲ။

ဇနီးကောင်းဆိုတာ ဘာလဲ သား။ သားသိချင်ရင် အဖေ အကြံပေးမယ်။ ပထမဆုံးအနေနဲ့ *အပြောအဆို ပြေပြစ်ချေငံသူ၊ လှိုက်လှဲနွေးထွေးမှုရှိသူ၊ စိတ်သဘောထားကောင်းသူ* မျိုးကို စဉ်းစားသင့်တယ်လို့ အဖေ ပြောချင်တယ်။

သဘောထားသေးတဲ့၊ စိတ်ဆိုးစိတ်ကောက်လွယ်တဲ့၊ မနာလို ဝန်တိုစိတ်များတဲ့ မိန်းကလေးမျိုးဆို သတိထားပါ။ ယူမိရင် နောင်ကျတော့ အကြီးအကျယ် ဒုက္ခရောက်မှာပဲ။ သိပ်အတင်းပြောတတ်တဲ့ မိန်းကလေးကိုလည်း ရှောင်ဖို့လိုတယ်။ လောဘကြီးတဲ့ မိန်းကလေးမျိုးဆိုတာကတော့ ကြောက်ဖို့ အကောင်းဆုံး။ လုံးဝဝေးစွာ ရှောင်ပေတော့။

ဇနီးမယားဆိုတာ ကိုယ်တစ်သက်လုံး ကြည့်နေမြင်နေရမယ့်ဟာမျိုးဆိုတော့ မျက်နှာလေးက ကြည့်ချင်မြင်ချင်စရာလေး ဖြစ်နေဖို့တော့ လိုလိမ့်မယ်။ သားအကျိုးအတွက် ပြောတာပါ။ လှတယ်ဆိုတာ အပေါ်ယံ အရေပြားလေးတင်ပါဆိုတာ မမှားပါဘူး။ ဒါပေမယ့်လည်း တကယ့်လက်တွေ့ကျတော့ အဲ့ဒီအပေါ်ယံအလှလေးသည်ပဲ ကြည့်ရတာ နှစ်သက်စရာ မဟုတ်လား။ အတွင်း စိတ်အလှလေးနဲ့သာ ပေါင်းစပ်ပေးလိုက်နိုင်မယ်ဆိုရင်တော့ အတိုင်းထက် အလွန်ပေါ့။

အဲ့ဒီ စိတ်အလှ၊ ရုပ်အလှတွေထက် ပိုအရေးကြီတာ ဆိုရင်တော့ ဉာဏ်ပညာရှိဖို့ပဲ ဖြစ်မယ်။ ဇနီးသည်ကောင်းတစ်ယောက်ဟာ ဉာဏ်ပညာ ရှိဖို့လိုတယ်။ စိတ်ဓာတ်ကြံ့ခိုင်ဖို့လည်း လိုတယ်။ ပြီးတော့ သစ္စာ ရှိဖို့လည်း လိုတယ်။ ခင်ပွန်းသည်ကို ကြင်နာတတ်သူ၊ ဂရုစိုက်တတ်သူမျိုးလည်း ဖြစ်သင့်တယ်။ လူတွေရဲ့ အရည်အသွေးကို သိတတ် အကဲဖြတ်တတ်ပြီး ယဉ်ကျေးလိမ္မာစွာ ပြုမူဆက်ဆံတတ်သူမျိုး၊ စကားပြောဖော်ကောင်း တစ်ယောက် ဖြစ်နိုင်မယ့်သူမျိုး၊ သဘာဝလောကရဲ့ အလှအပတွေ၊ ပတ်ဝန်းကျင်မှာ ရှိတဲ့ ဝမ်းသာစရာ အားတက်စရာ အပြုံးနဲ့ တုံ့ပြန်ချင်စရာတွေ မှန်သမျှကို မလစ်မလပ် သိမြင်တတ်တဲ့ မိန်းမမျိုးလည်း ဖြစ်စေချင်တယ်။

အချုပ်အနေနဲ့ဆိုရရင်တော့ သားရဲ့ ဇနီးလောင်းဟာ သစ္စာရှိ အဖော်မွန် ပီသစွာ သားနဲ့ အပေးအယူမျှမျှ ပေါင်းသင်းနေထိုင်သွားနိုင်စွမ်း ရှိဖို့ပါပဲ။

ဇနီးကောင်းတစ်ယောက်အတွက် တခြား နောက်ထပ် စဉ်းစားစရာတွေ အများကြီး ရှိသေးတာပေါ့။ ဝီရိယ ရှိလား၊ လက်ကြောမတင်းဘူးလား၊ သန့်ရှင်းသူလား၊ သူရှုပ်ထားတာတွေ ကိုယ်က လိုက်ရှင်းနေရတာမျိုး ဆိုလည်း မဟန်ဘူးလေ။ ပြီးတော့ ရယ်ရွှင်တတ်သူလား၊ ဟာသဉာဏ်ရှိသူလား။ ဟာသဉာဏ်ရှိတဲ့ မိန်းကလေးဆိုရင်တော့ အဲ့ဒါ အပိုဆုရတာပဲ။

ဒါပေမယ့်လည်း…

ဒါပေမယ့်လည်း အရည်အချင်းအားလုံး ပြည့်စုံနေတာမျိုးတော့ ရဖို့မလွယ်ဖူးပေါ့။ ဉာဏ်ပညာရှိတယ်၊ ရုပ်ဆင်းအင်္ဂါတင့်တယ်တယ်၊ အလွယ်တကူ သိတတ် ခံစားနားလည်တတ်သူ ဖြစ်တယ်ဆိုရင်တော့ ကျန်တဲ့ အားနည်းချက်တစ်ခုတစ်လေက လက်ခံရမှာပေါ့။ အဲ့ဒီသုံးခုကတော့ ပိုအရေးကြီးတာ အမှန်ပဲ။

သားရဲ့ ဘဝတစ်သက်တာ ကြင်ဖော်အဖြစ်ရွေးမယ့် သား အမြတ်တနိုး တန်ဖိုးထားတဲ့ မိန်းကလေးမှာ ဘယ်လိုအရည်အချင်းတွေ ရှိရမယ်ဆိုတာ သား စဉ်းစားဆုံးဖြစ်ပါ။ ပြီးရင် အဲ့ဒီအရည်အချင်းတွေနဲ့ ပြည့်စုံတဲ့ သားရဲ့ စံပြအမျိုးသမီးကို လိုက်ရှာပါ။ တွေ့ပြီဆိုရင်တော့ ဦးနှောက်စွမ်းရည်ကို နှလုံးသားအင်းအားပါ အပြည့်အဝ စိုက်ထုတ်ပြီး မရမနေ ကြိုးပမ်းပါတော့။ “*ဇွဲမကောင်းပဲနဲ့တော့ မိန်းမချောတစ်ယောက်ရဲ့ မေတ္တာကို ရမလာနိုင်ဘူး။*” ဆိုတဲ့ စကားကို သား မမေ့ပါနဲ့။

လက်ထပ်ပြီးရင်…

သား စိတ်တိုင်းကျတဲ့ အိမ်ထောင်ဘက်ကို ရှာတွေ့လို့ လက်ထပ်ထိမ်းမြားဖြစ်ခဲ့ပြီ ဆိုပါတော့။ အဖေ ကြိုသတိပေးပါရစေ။ သားခေါင်းထဲမှာ လုပ်ငန်းအတွက် သုံးစွဲမယ့် အချိန်ရယ်၊ မိသားစုအတွက် အချိန်ရယ်ကို မျှမျှတတ ခန့်ခွဲထားပါ။ တစ်ဖက်ဖက်ကို အချိန်ပေးတာ မမျှတတာနဲ့ ရေရှည်မှာ အဆင်မပြေတာတွေ ဖြစ်လာလိမ့်မယ်။ အထူးသဖြင့် Honeymoon ကာလ ပြီးတာနဲ့ အလုပ်ထဲ အချိန်တအား ပစ်ပေးတာမျိုး မလုပ်မိစေနဲ့။ ငွေဆိုတာ ဘဝရဲ့ အရေးကြီးတဲ့ အစိတ်အပိုင်းမို့ ဒီငွေနောက်ကို တကောက်ကောက်လိုက်ကြရတာ အဖေတိုအလုပ်ပါ။ ဒါပေမဲ့လည်း မိသားစု စားဝတ်နေရေးအတွက် ဆိုပြီး မနက် ၈နာရီကနေ ညနေ ၆ နာရီအထိ သွားနေရမယ်ဆိုရင်တော့ အဖေတို့ ရွေးချယ်လိုက်တဲ့ အလုပ်ဟာ မှားနေပြီလို့ ဆိုရလိမ့်မယ်။

အဲ့ဒီအချက်ကို အလေးအနက် သတိထားပါ။

အဖေရဲ့ အခုအကြံပေးချက်တွေထဲက တော်တော်များများကို သား ဂရုတစိုက် လိုက်နာမယ် ဆိုရင်တော့ သား အိမ်ထောင်မှုသုခချမ်းသာကို သား ခံစားရနိုင်ပါလိမ့်မယ်။

သားရဲ့ဖူးစာရေးနတ်

အဖေ

ဆိုပြီး စာကို အဆုံးသတ်ထားပါတယ်။ ဒီစာကို ဖတ်ပြီး အတွေးတစ်ခုမက ကျန်နိုင်ကြပါစေဗျာ။

လူတိုင်း စိတ်၏ ချမ်းသာ ရကြပါစေ။

လေးစားလျက်

မောင်သန့်ဇင်